"გორის უნივერსიტეტს უკვე 10 წელია მართავს კლანი", -განაცხადა რადიო "მოზაიკასთან" საუბრისას კახა ტოლიაშვილმა. ტოლიაშვილი გორის უნივერსიტეტის რექტორის არჩევნების შედეგებს გამოეხმაურა და უნივერსიტეტში არსებული ვითარება "პუტინისა და მედვედევის" მმართველობას შეადარა.

ტოლიაშვილი ფიქრობს, რომ ყოფილი რექტორი გიორგი სოსიაშვილი და მისი მოადგილე ალექსანდრე მღებრიშვილი თანამდებობებს ცვლიან, რეალურად კი უნივერსიტეტში მმართველობის კუთხით არაფერი იცვლება. 

"გორის უნივერსიტეტში დიდი ხანია კლანური მმართველობაა, რომელიც პუტინივით და მედვედევივით ერთმანეთს ცვლის და ჭაობში ამყოფებს უნივერსიტეტს. აკადემიურმა საბჭომ მხარი არ დაუჭირა განვითარებას და პროგრესს. უნივერსიტეტს იყენებენ პირადი კეთილდღეობისთვის. მათ არ აინტერესებთ სტუდენტები და საზოგადოებრივი ინტერესი, უნივერსიტეტს განვითარების საშუალებას არ აძლევენ", - განაცხადა კახა ტოლიაშვილმა. 

სოსიაშვილი ახალი რექტორის მოადგილეობას ამ ეტაპზე არ ადასტურებს და ამბობს, რომ ეს საკითხი ადმინისტრაციის გადასწყვეტია. 

გორის უნივერსიტეტში აკადემიურმა საბჭომ ახალი რექტორი აირჩია. საბჭოს წევრების სრულმა შემადგენლობამ არჩევანი კახა ტოლიაშვილსა და ალექსანდრე მღებრიშვილს შორის გააკეთა. უნივერსიტეტს დღეიდან ალექსანდრე მღებრიშვილი უხელმძღვანელებს, რომელიც მანამდე რექტორის მოადგილის თანამდებობას იკავებდა.